Este domingo no recinto de Ara Solis disputase o partido de volta da primeira ronda da Copa da Costa. Na ida celebrada no Carral venceu a SD Sofan por 2-1. Pouca ventaxa a que levan os sofanistas, que nin moito menos poden viaxar tranquilos ó recinto fisterrán. Preocupa na expedición carballesa o estado do terreo de xogo, moi irregular durante todo o ano e que non permite un fútbol excesivamente combinativo.
Ten David Baña as dúbidas de Mario, Gustavo e Gende, con diversas molestias, pero se non ocurre nada raro no entreno desta tarde moi posiblemente serán da partida. Os xogadores van mentalizados para disputar un partido duro e competido, pois están ilusionados co papel que se pode facer nesta edición da Copa, e tentarán superar a decepción que supuxo quedar eliminados o ano pasado na primeira ronda contra o Camariñas nunha agónica tanda de penaltis.
